Finansiëlebestuurder

Ons gewaardeerde kliënt, ’n gevestigde en diverse landbougroep buite White River, is op soek na ’n ervare, dinamiese en strategies sterk Finansiële Bestuurder om ’n sleutelrol te vervul binne die uitvoerende bestuurspan van die onderneming.

Hierdie is ’n senior bestuursgeleentheid vir ’n finansiële professionele persoon wat nie slegs sterk tegniese en administratiewe finansiële vermoëns na die tafel bring nie, maar ook die kommersiële insig, bestuursvolwassenheid en praktiese ingesteldheid het om ’n betekenisvolle bydrae te lewer tot die onderneming se strategiese rigting, finansiële beheer, risikobestuur en langtermyn volhoubaarheid. Die suksesvolle kandidaat sal direk aan die Groep-Hoof Uitvoerende Beampte rapporteer en ’n integrale rol speel in die verdere ontwikkeling en bestendiging van die groep se finansiële funksie.

Hierdie pos bied aan die regte kandidaat die geleentheid om deel te word van ’n gevestigde landbou-onderneming waar die finansiële bestuurder nie bloot ’n ondersteunende funksie vervul nie, maar as ’n belangrike lid van die uitvoerende span werklik invloed uitoefen op die besigheid se besluitneming, groei en toekomstige rigting. Die rol bied blootstelling aan ’n diverse groepstruktuur, ’n wye spektrum van finansiële en operasionele verantwoordelikhede, asook die geleentheid om ’n tasbare verskil te maak binne ’n dinamiese landbou-omgewing. Vir ’n kandidaat wat ’n senior rol met inhoud, verantwoordelikheid, betrokkenheid en langtermynpotensiaal soek, verteenwoordig hierdie ’n besonder aantreklike loopbaangeleentheid.

Die ideale kandidaat beskik oor:

• ’n BCom-graad met Rekeningkunde tot minstens derdejaarsvlak
• ’n Honneursgraad sal voordelig wees
• ’n Professionele kwalifikasie soos CA, ACA, CIMA, CPA of soortgelyk sal sterk voorkeur geniet
• Minimum 3 jaar of meer ondervinding in ’n soortgelyke senior finansiële rol binne ’n groep van maatskappye met ’n omset van meer as R100 miljoen
• Ondervinding binne ’n landbou- of verwante operasionele besigheidsomgewing sal voordelig wees
• Sterk tegniese finansiële vermoëns en opgedateerde kennis van Internasionale Finansiële Verslagdoeningsstandaarde vir Klein en Medium Ondernemings
• Bewese ervaring in die voorbereiding, hersiening en kritiese ontleding van bestuursrekeninge
• Ervaring in die voorbereiding van jaar-einde finansiële state en die bestuur van jaarlikse eksterne ouditprosesse
• Ervaring in risikobepalings, interne ouditprosesse en/of die evaluering en versterking van interne beheermaatreëls
• Goeie kennis van en praktiese ervaring met SARS-verwante aangeleenthede, insluitend:
  • BTW
  • PAYE / LBS
  • Inkomstebelasting
  • Dieselrabatte
• Ondervinding met HR-verwante administratiewe en nakomingsaangeleenthede, insluitend:
  • Salarisverwerking
  • COIDA
  • UIF
  • Voorsorgfondse
• Hoë vlakke van emosionele intelligensie
• Sterk geskrewe en mondelinge kommunikasievaardighede
• Goeie rekenaarvaardigheid

Sleutelverantwoordelikhede:

• Volledige finansiëlebestuur en beheer van die groep van maatskappye
• Voorbereiding, hersiening en ontleding van maandelikse bestuursrekeninge en finansiële verslae
• Voorbereiding van jaar-einde finansiële state
• Koördinering en bestuur van die jaarlikse eksterne ouditproses
• Verseker van finansiële akkuraatheid, wetlike nakoming en effektiewe interne beheer
• Bestuur van SARS-verwante aangeleenthede, insluitend belasting, statutêre indienings en dieselrabatte
• Toesig oor salaris- en sekere HR-verwante administratiewe funksies
• Identifisering, evaluering en bestuur van finansiële en operasionele risiko’s
• Ondersteuning van strategiese besluitneming as deel van die uitvoerende bestuurspan
• Direkte verslagdoening aan die Groep Hoof Uitvoerende Beampte

Die ideale kandidaat is ’n professionele, gebalanseerde en selfstandige finansiële bestuurder wat gemaklik funksioneer in ’n senior rol waar strategiese denke, tegniese akkuraatheid en praktiese uitvoering hand aan hand loop. Die onderneming is op soek na ’n persoon met integriteit, volwassenheid en goeie oordeel, wat sterk beheer kan toepas, met selfvertroue met senior bestuur kan skakel, en terselfdertyd bereid is om nou betrokke te wees by die praktiese realiteite van ’n diverse landbou-onderneming. ’n Natuurlike sin vir verantwoordelikheid, kommersiële insig en ’n sterk eienaarskapmentaliteit sal in hierdie rol van besondere waarde wees.

’n Uitgebreide en mededingende salaris- en voordelepakket word aangebied volgens die suksesvolle kandidaat se ervaring, kwalifikasies en algehele geskiktheid vir die rol.

Diensaanvaarding: So gou as moontlik

Sluitingsdatum: 15 Mei 2026

Indien jy ’n toegewyde Finansiëlebestuurder is wat gereed is vir ’n nuwe uitdaging by 'n diverse Landbougroep, sien ons uit na jou aansoek deur diè skakel 👉 [aansoek]