Kommersiële Helikopter- en Vastevlerkvlieënier

Jy het reeds genoeg vliegervaring opgebou om te verstaan dat ’n professionele vlieënier se waarde nie slegs aan vliegure gemeet word nie.

Dit word gemeet aan voorbereiding, oordeel, kalmte, diskresie en die vermoë om die regte besluit te neem wanneer roetes, weerstoestande of reisprogramme verander. Dit beteken ook dat jy professioneel en beginselvas genoeg moet wees om ’n vlug uit te stel of te kanselleer wanneer veiligheid dit vereis.

Hierdie is ’n geleentheid vir ’n ervare kommersiële vlieënier binne Landbou wat bevoeg is om beide helikopters en vastevlerkvliegtuie te vlieg en met die veilige, professionele en diskrete vervoer van privaat en uitvoerende passasiers vertrou kan word.

Die pos is in die Johannesburg-omgewing gebaseer en behels privaat en uitvoerende vervoer na verskillende bestemmings soos operasionele en reisbehoeftes bepaal.

Die primêre fokus sal op helikopterbedrywighede val, maar die vlieënier moet ook oor ’n geldige kommersiële vastevlerklisensie, toepaslike graderings en praktiese vastevlerkvliegervaring beskik.

Die helikopteromgewing kan blootstelling aan die volgende of soortgelyke platforms insluit:

• Bell 206 JetRanger
• Bell 407
• Robinson R44
• Robinson R66

Die presiese vliegtuigmodelle, variante en vastevlerkvloot sal tydens die keuringsproses bevestig word.

Johannesburg sal die primêre basis wees, maar gereelde uitbasiswerk, veranderende reisprogramme en oornagverblyf vorm ’n normale deel van die pos. Die vlieënier moet gemaklik wees met vertrek- en terugkeertye wat nie altyd binne gewone kantoorure val nie.

Die geskikte kandidaat is ’n gevestigde kommersiële vlieënier wat professioneel tussen helikopter- en vastevlerkbedrywighede kan funksioneer.

Jy sal waarskynlik goed in hierdie pos pas indien jy:

• veiligheid konsekwent bo gerief of programdruk plaas;
• sterk en onafhanklike go/no-go-besluite kan neem;
• kalm en professioneel onder druk optree;
• diskreet met passasiers, bestemmings en reisprogramme omgaan;
• deeglik voorbereid en georganiseerd werk;
• buigsaam oor reis, oornagverblyf en veranderende programme is;
• gemaklik is om selfstandig verantwoordelikheid vir vlugvoorbereiding en uitvoering te neem; en
• ’n langtermynvertrouenspos eerder as ’n korttermyn-uurbougeleentheid soek.

Die vlieënier sal verantwoordelik wees vir die veilige en professionele vervoer van die werkgewer, uitvoerende passasiers en ander goedgekeurde persone per helikopter en vastevlerkvliegtuig.

Die kern van die pos is vlieg en vervoer. Die kandidaat sal nie primêr verantwoordelik wees vir die meganiese instandhouding of algemene bestuur van die lugvaartonderneming nie.

Volledige vlugvoorbereiding, regulatoriese nakoming, passasiersveiligheid, risikobestuur en die akkurate voltooiing van vereiste vlieg- en vliegtuigrekords bly egter ’n integrale deel van die pos.

Sleutelverantwoordelikhede

• Veilige vervoer van privaat en uitvoerende passasiers.
• Uitvoering van helikopter- en vastevlerkvlugte volgens operasionele behoeftes.
• Voorbereiding van plaaslike en langerafstandvlugte.
• Roete-, weer-, brandstof- en alternatiewebestemmingsbeplanning.
• Kontrolering van toepaslike NOTAMs, lugruimbeperkings en operasionele inligting.
• Berekening en verifiëring van massa en balans.
• Uitvoering van voorgeskrewe voor- en navlugkontroles.
• Bevestiging dat die vliegtuig veilig, wettig en geskik vir die beplande vlug is.
• Professionele ontvangs en hantering van passasiers.
• Aanbieding van toepaslike passasiersveiligheidsinligting.
• Koördinering van passasiersbagasie binne die vliegtuig se operasionele beperkings.
• Veilige hantering van veranderende programme, bestemmings en weerstoestande.
• Tydige kommunikasie rakende vertrektye, vertragings en operasionele beperkings.
• Akkurate voltooiing van logboeke, vliegrekords en vereiste dokumentasie.
• Koördinering met goedgekeurde operateurs, instandhoudingspersoneel, lughawens en grondpersoneel waar nodig.
• Handhawing van streng vertroulikheid rakende passasiers, bestemmings en reisbewegings.
• Gereelde uitbasiswerk en oornagverblyf volgens die reisprogram.

Minimum vereistes

• Geldige SACAA – Helikopter, CPL(H).
• Geldige SACCAA – Vastevlerk, CPL(A).
• Geldige Klas 1-mediese sertifikaat.
• Geldige naggradering en toepaslike vliegtuiggraderings.
• Onlangse en verifieerbare vliegervaring op beide helikopters en vastevlerkvliegtuie.
• Minstens 1 500 totale helikoptervliegure.
• Minstens 750 helikopterure as "Pilot in Command".
• Minstens 300 turbinehelikopterure.
• Sterk, onlangse ervaring op ligte enkelmotor-turbinehelikopters.
• Praktiese ervaring met privaat, korporatiewe of uitvoerende passasiersvervoer.
• Tipe-ervaring op die Bell 206 JetRanger, Bell 407, Robinson R44 en/of Robinson R66 sal sterk voorkeur geniet.
• Kandidate moet toepaslik gegradeer wees of vir die nodige operateur-, tipe- en versekeringsgoedkeuring kwalifiseer.
• Goeie kennis van vlugbeplanning, weerinterpretasie, massa en balans, brandstofbeplanning en operasionele risikobestuur.
• Goeie Engelse lugvaartradio- en kommunikasievaardighede.
• Geldige paspoort.
• Geldige rybewys.
• Bereidwilligheid om gereeld te reis, uitbasis te werk en van die huis af te oornag.
• Bereidwilligheid om volgens veranderende vlugprogramme te werk, insluitend sommige naweke en openbare vakansiedae.
• Verifieerbare vliegure, lisensiegeskiedenis, veiligheidsrekord en verwysings.

Dronebevoegdheid en toekomstige opleiding

’n Geldige SACAA Lisensie of toepaslike professionele dronekwalifikasie sal ’n sterk voordeel wees, maar is nie ’n vereiste by aanstelling nie.

Kandidate wat nog nie oor ’n dronekwalifikasie beskik nie, moet ’n opregte belangstelling hê om drones professioneel binne ’n plaas- en landbou-omgewing te gebruik.

Hierdie gebruik kan mettertyd onder meer die volgende insluit:

• lugwaarneming oor plase en landbougrond;
• monitering van gewasse, vee of infrastruktuur;
• visuele inspeksies van afgeleë gebiede; en
• ondersteuning van praktiese landbou- en bestuursbesluite.

Toepaslike opleiding kan, volgens operasionele behoeftes en die geskiktheid van die kandidaat, deur ’n goedgekeurde opleidingsverskaffer gefasiliteer en/of gereël word.

Enige dronebedrywighede sal binne die toepaslike wetlike, lisensie-, vliegtuig- en operateurvereistes uitgevoer word.

Sterk voordele

• Geldige Remote Pilot Licence en praktiese dronevliegervaring.
• Drone-ervaring binne ’n plaas-, natuur-, wild- of landbou-omgewing.
• Instrumentgradering vir helikopter- en/of vastevlerkbedrywighede.
• Onlangse ervaring op Bell- of Robinson-helikopters.
• Ervaring met verskeie ligte vastevlerkvliegtuigtipes.
• Ervaring met vlugte na plase, afgeleë landingsbane en privaat vliegvelde.
• Ervaring met langerafstand- en uitbasisbedrywighede.
• Formele "Crew Resource Management-, Safety Management System-" of operasionele risikobestuuropleiding.

Persoonlike eienskappe

• Veiligheidsgerig en beginselvas
• Kalm en beslis
• Diskreet en professioneel
• Stiptelik en deeglik voorbereid
• Aanpasbaar en selfstandig
• Diensgerig sonder om veiligheidsgrense te verskuif
• Betroubaar met ’n sterk verantwoordelikheidsin
• Bereid om nuwe tegnologie en dronebedrywighede aan te leer

Slegs kandidate wat oor geldige kommersiële helikopter- én vastevlerkbevoegdheid, toepaslike vliegervaring en ’n bewese veiligheidsbenadering beskik, sal oorweeg word.

’n Dronekwalifikasie is nie verpligtend nie, maar die kandidaat moet bereid en gemotiveerd wees om toepaslike opleiding te ondergaan indien dit in die toekoms van die rol vereis word.

’n Markverwante salaris eie aan die bedryf met voordele word aangebied

Diensaanvaarding: So gou as moontlik
Aansoeke sluit: 11 Augustus 2026

Ervare kommersiële vlieëniers wat hul loopbaan binne ’n professionele, vertrouensgebaseerde privaat omgewing binne Landbou wil voortsit, word genooi om aansoek te doen deur diè skakel👉 [aansoek]